Gal 2 | PONPDN | STEP | KADEKADEO murin par eisok paieu nai pil kodalan Ierusalem ian Parnapas o Titus pil ian ia.

Galatians 2

1 KADEKADEO murin par eisok paieu nai pil kodalan Ierusalem ian Parnapas o Titus pil ian ia. 2 A i kokidala kasalepa eu; padaki on irail duen ronamau, me i kin padaki on men liki kan, ap katoror on ir, me kalok mau, pwe i ender tan mal, ma met de mur. 3 A pil Titus, me ian ia, men Krik amen, re sota kakaliki on i, en sirkomsaisela, 4 A pweki akai saulan likam, me wailon, pwen masamasan at saledokalar, me se aleer ren Kristui Iesus, pwen kalidui kit ala. 5 A se sota man peiki on irail, pwe melel en ronamau en mimieta re omail. 6 A irail me kalok mau, i sota asa duen ar tiak en mas o, a pil menda re i, pwe Kot sota kin lipilipil aramas amen, irail me indand mau, sota ki on ia eu padak toror. 7 A irail lao kilaner, me i aleer ai koa, en padaki on me sosirkomsais ronamau, dueta Petrus on me sirkomsais. 8 A me kamanada Petrus, pwen kapwaiada a koa en wanporon ren sirkomsais i me i pil keleki ni ai dodok ren men liki kan. 9 A Iakopus, o Kepas, o Ioanes, me re wiaki ur oko, re lao kilaner mak o me i aleer, rap itipa ki on nai o Parnapas pali maun en pa, o kit karos wiaki eu, me kit en kola ren men liki kan, a irail ren sirkomsais. 10 A re kakaliki on kit, me sen apapwali me samama kan. Nai ari nantion kapwaiada. 11 A Kepas lao pwaralan Antiokien, i ap palian i pwe kalok sued mi re a. 12 Pwe mon akai pwarado san ren Iakopus, a sakasak ren men liki kai, a ni ar pwarador, a puei san katororela pein i, pwe a masak men sirkomsais. 13 O pil Sus tei ko ian i malamalaundar, o Parnapas lodi on pil wia malaun. 14 A ni ai kilaner, me re sota inen weita, duen melel en ronamau, i ap indai on Kepas mon irail karos; ma koe men Sus amen kin wia tiak en men liki kan, a so tiak en men Sus, menda koe kin kakaliki on men liki kan, ren wiada tiak en men Sus? 15 Kita udan men Sus a sota dipan dueta men liki kan, 16 Ap asa, me aramas amen sota kak pun kila wiawia en kapun kan, pwe a poson Iesus Kristus eta i me kitail pil posoneki Kristus Iesus, pwe kitail en pun kila poson Kristus, a kaidin wiawia en kapun kan; pwe uduk sota kak pun kila wiawia en kapun kan. 17 A ma kitail men pun kila Kristus, ap diarokada, me kitail me dipan, daduen, Kristus me papan dip? O so! 18 Pwe ma i pan pur on kauada, me i kawelar, nan i pan wia kin ia me dipan amen. 19 Pwe i mekilar kapun, ap solar memauri on kapun, pwen mauri on Kot; nai lopular ian Kristus. 20 Kaidin nai me memaur, pwe Kristus kotin ieiasata lolei. Pwe arain ai maur en pali uduk, I kin memaureki poson Sapwilim en Kot, me kotin pok on ia o sokonpaudeki on ia pein i. 21 I sota kasamal la mak en Kot; pwe ma aramas kak pun kila wiawia en kapun kan, Kristus ap matala mal.